جهانگارا 1: جهانگارا تعلقي سيوهڻ ۾ هڪ يونين ڪائونسل، تپو ۽ ڳوٺ آهي، جنهن جي آبادي 20 هزارن جي لڳ ڀڳ ٿيندي. جهانگارن لاءِ چيو وڃي ٿو ته ان کي ’جهانگار‘ ذات جي ماڻهن آباد ڪيو هو. سنڌ تي عربن جي ڪاهه وقت جهانگارا سيوهڻ سرڪار جو پرڳڻو هو ۽ محمد بن قاسم هن شهر/ ڳوٺ وٽان لنگهي منڇر ڍنڍ پار ڪئي هئي. هڪ ٻي روايت مير علي شير قانع ڪتاب ’تحفة الڪرام‘ ۾ لکي آهي ته:
”ڄام چينو خان ڀائرن جي نفاق کان مجبور ٿي، جڏهن پنهنجن ساٿين سان گڏجي کنڀاٽ پهتو ته هو اڍيجا قبيلي سان رهڻ لڳو ۽ پاڻ کي مضبوط ڪندو رهيو. ملتان کان واپس موٽڻ بعد چيني خان سيوستان (سيوهڻ) کان 6 ڪلو ميٽر پري، اولهه طرف هڪ مناسب هنڌ تي نئون شهر ٻڌايو، جنهن تي باجارا نالو رکيائين“. ماضيءَ ۾ سيوهڻ پرڳڻي ۾ جهانگارا، نئينگ، شاهه حسڻ، ٻنڌڙي، باجارا، ٺيڙهي ۽ منڇر ڍنڍ وارا علائقا اچي ويا ٿي.